Wa pay gipapauli gikan sa Isolation Center sa Brgy Luz

CEBU, Philippines — Wa pay pasyente nga gi-quarantine diha sa Bario Luz Elementary School sa Dakbayan sa Sugbo ang gipapauli na sa ilaha sukwahi sa mga nanggawas nga report nga dunay 100 nga nagpositibo sa coronavirus disease (COVID-19) didto ang nakagawas na.

Ang unang batch nga gilangkuban og 69 ka tawo napaubos na sa ikaduhang swab test aron pagtinom kun makapauli na sila.

“Nahuman na mig re-swab kaming first batch, pero basin magpaabot pa mig mga usa ka semana daw anha pa namo mahibaw-an ang resulta,” sumala pa sa usa sa mga pasyente.

Gawas kanila, duna pay 59 ka buok sa laing batch ang gipaubos pagbalik sa swab test tungatunga ning buwana sanglit ang kataposang pasyente nga nadugang kanila niadtong lang Mayo uno gidala.

"Ila mang ibalik og count sa sugod kung naay madungag, so madugay-dugay pa jud to sila sa pikas," sumala pa sa laing pasyente.

Ang pamahayag sa maong mga pasyente sukwahi sa nigawas nga balita (dili dinhi sa Banat News) nga giingong si Cebu City Administrator Floro Casas Jr., nipahibalo atol sa sesyon sa Konseho niadtong Miyerkules nga adunay 100 ka asymptomatic patients sa barangay isolation center ang gikatakda ng mogawas kay negatibo na sila sa maong virus.

Apan report nakapabalak sa mga pasyente ug ilang pamilya diha sa Sitio Zapatera, Barangay Luz.

Giklaro sa tigpamaba sa barangay nga si Eldebrian Arañez miklaro nga wala pa bisan sa unang batch ang gipapauli.

“Dili na tinuod, we can confirm diri sa barangay wala mi news or info coming from the city health and Department of Health (DOH) na naa gi-release na 100. So, that report – dili gyud na tinuod,” pagklaro ni Arañez.

Matud pa kaduha pa kuhaan og swab test ang mga pasyente ug kinahanglang negatibo gyud sila sa duha.

“First test pa ni after sa ilang 14 days. Kung mag-negative, i-swab nasab balik.  Tapos, kung ma-confirm na sa two negative tests, kay dili pa gyud na sila ipa-uli diretso.  I-transfer pa na sila sa transition rooms for another 14 days,” dugang pang Arañez. Caecent No-ot Magsumbol, The Freeman/IBM