Nagumpisal si Yolanda (alang sa mga biktima sa bagyong Yolanda)

Taliwala sa akong hangin ug uwan

ang kahagip-ot sa inyong panimalay,

ug sa inyong pamahaw:

ang mga nahinanok ninyong mga damgo.

Gidayeg ko ang inyong kaisog

sa akong pagkulikot sa inyong dughan,

bisan kini ningkipus,

akong madungog ang mga tipak-tipak

sa inyong natun-as nga gininhawa, nisubli

kini kanako, miuliot sa yuta,

apan mitapot sa akong mata

ang inyong pagkalimot sa pag-amuma

sa akong mga igsuon, dili na nako sila mailhan,

bisan ilang mga ngalan inyong gikalimtan.

Pasayloa ko, apan gibundak ko kaninyo

ang akong pagkahunlak, mao kining taknaa

nga akong bawion ang inyong mga kaugalingon

aron inig balik ani, ang mga kalasangan, dagat ug uwan

matinud-anong mangita sa inyong mga tudlo ug palad.