Liboan ka senior citizens gibuligan sa Kapitolyo

CEBU, Philippines - Miabot ngadto sa 51,441 ka senior citizens sa kalungsuran ang nakadawat og hinabang sa probinsya gikan sa buwan sa Enero niining tuiga hangtud niining buwana. Ang mga hinabang nga ilang nadawat gilangkuban sa 3 ka kilong bugas, 1 ka karton nga gatas ug 3 ka lata nga sardinas.

Ang maong pagpanghatag og hinabang subay sa “Halad ni Lolo ug Lola” nga programa sa Kapitolyo nga gipasiugdahan ni Bise Gobernador Agnes Magpale ug Provincial Social Welfare and Development Office niadto pang tuig 2014.   

Nigahin ang PSWDO og P15.9 milyones nga pundo matag tuig alang niini.

Niadtong Enero 11 ug 26, 2,544 ka senior citizens ang nakadawat og hinabang sa dakbayan sa Toledo ug 2,089 sa lungsod sa Barili. Pagka Pebrero 2, 13 ug 17, 1,544 ang nakadawat sa lungsod sa Balamban, 1,333 sa lungsod sa Alcantara ug 2,226 sa lungsod sa Liloan. Niadtong Marso 11, 15, 16 ug 17 sa lungsod sa Barili laing 2,215 ka senior citizen ang nakadawat og hinabang, 2,262 sa lungsod sa Madridejos, 6,691 sa lungsod sa  Bantayan ug 2,891 sa lungsod sa Santa Fe.

Niadtong Abril 13 ug 21, niabot sa 4,342 ka seniors ang nakadawat og hinabang.

Pagka Hulyo 27, 5,353 ka mga senior citizen sa dakbayan sa Talisay ang nakadawat og hinabang.

Sa Agosto 18, sa lungsod sa Badian, 2,150 ka senior citizen ang nakadawat.

Sa lungsod sa San Remigio, 716 ang natunolan og hinabang niadtong Septiyembre 13 ug pagka 27, dugang 5,200 ka seniors ang nahatagan sa dakbayan sa Talisay.

Niadtong Oktubre 6 ug 28, 368 ka senior citizens sa lungsod sa San Fernando, 404 sa lungsod sa Minglanilla ug 4,473 sa lungsod sa Dumanjug ang nakadawat usab og hinabang. Niadtong Nobiyembre 10, 16 ug 24, 126 sa lungsod sa Asturias, 2,371 sa lungsod sa Dalaguete ug 1, 974 sa lungsod sa Ronda ang mga nakadawat og hinabang. (BANAT NEWS)