Cone nagulat sa pagdomina ng Ginebra sa SMB sa serye
MANILA, Philippines — Walang naalala si Barangay Ginebra coach Tim Cone na tinalo ng dalawang sunod ang San Miguel, lalo pa kaya ang tatlo para umabante sa championships series ng 2023 PBA Governors’ Cup.
Dinalawahan ng Gin Kings ang Beermen matapos iposte ang 121-103 panalo sa Game Two para ilista ang 2-0 bentahe sa kanilang best-of-five semifinals series noong Linggo.
Nauna nang dinaig ng ‘never-say-die’ team ang SMB sa Game One, 121-112, noong Biyernes.
“I don’t remember winning especially against San Miguel, a Game 2,” wika ni Cone. “I’m shocked by this game in terms of how well our guys played. Really shocked and obviously pleased.”
May pagkakataon ang Ginebra na walisin ang San Miguel sa Game Three bukas papasok sa kanilang ikalawang sunod na PBA Finals matapos magkampeon sa nakaraang Commissioner’s Cup kalaban ang guest team na Bay Area Dragons.
“It’s nearly impossible to beat them three straight times. I mean, we’re gonna try and do the impossible on Wednesday,” sabi ng two-time PBA Grand Slam champion coach.
Sa panalo sa Game Two ay kaagad nagtala ang Gin Kings ng 18-1 abante bago ibaon ang Beermen sa 96-72 mula sa dalawang free throws ni import Justin Brownlee sa fourth quarter.
Tumapos sina Brownlee at Christian Standhardinger na may tig-32 points habang kumolekta si Scottie Thompson ng triple-double na 21 points, 11 boards at 11 assists bukod sa 3 steals at 2 blocks.
- Latest
