RCBC Gamsi misilyo sa ikaduhang puwesto
CEBU, Philippines — Ang RCBC Gamsi mipaksit sa SG5 Madison, 102-91, sa 30-above division sa Amicis Basketball League (ABL) Season 3 didto sa Cansaga gym sa Consolacion.
Sila si Jay-R Artezuela, Lemuel Malagar, ug Franco Te ang mibida sa RCBC Gamsi, nga misilyo sa No.2 spot sa Bracket A uban ang 5-1 rekord sunod sa way pildeng Artera Builders (5-0).
Si Artezuela miharos og 26 puntos samtang sila si Malagar ug Te nagkumboya'g 43 puntos alang sa RCBC Gamsi.
Mipabuto si Dhale Trazona og 33 puntos samtang sila si Ian Duaso ug Eugene Bataluna nagkumbinar og 42 puntos apan nangahoyhoy ang ilang abaga gumikan kay ang SG5 Madison natagak sa 2-3.
Sa ubang mga duwa, ang Level Up Poker mipayaka sa Lord Vincent, 75-71, samtang ang WeCare Transport mipakaging sa YYBC, 89-82.
Si Joseph Gerundio mi-iskor og 20, si Jay-R Yerro mitali og 18 puntos samtang si Arvin Tolentino midugang og 16 puntos alang sa Level Up Poker nga mitak-op sa ilang kampanya sa eliminasyon bitbit ang 4-2 nga baraha.
Sila si Arnel Momo ug Marlon Malagar nakatigum og 44 puntos samtang si Larry Malagar mitimbre og 16 puntos alang sa WeCare nga mikadlit sa ikatulo nilang daog sud sa lima ka duwa.
- Latest
