Buhay ng ilang expired COVID-19 vaccines, inextend

MANILA, Philippines — Pinalawig ng mga manufacturer ang ‘shelf-life’ o buhay ng ilang bakuna kontra COVID-19 na napaso na upang patuloy pang magamit ng publiko sa isinasagawang ‘vaccination drive’ ng pamahalaan.

Sinabi ni Health Secretary Francisco Duque III na sumulat sila sa kumpanyang Pfizer para palawigin ang ‘shelf life’ ng kanilang mga bakuna.

“Matapos nilang isinagawa ang stability studies ng kanilang bakuna, in-extend nila by 3 months,” ayon kay Duque, ngunit hindi nabanggit kung ilang doses ng bakuna ang sakop nito.

Nakipag-usap na rin ang kalihim sa AstraZeneca nitong Lunes para sa posibilidad na palawigin rin ang shelf life ng kanilang bakuna.

“I believe less than 1 percent na nag-expire titingnan kung puwede rin itong i-extend na hindi mababawasan ang kaniyang pagiging effective and iyong safety niya ay nasisiguro,” paliwanag ni Duque.

Kasalukuyang bumubuo ng ulat ang DOH kung bakit hindi nagamit ang mga bakuna bago sumapit ang expiration date ng mga ito.