EDITORYAL - Naa pa ang COVID-19

Bisan sa kaseryuso sa hulga aning coronavirus disease ug sa danyos nga nahimo niini sukad pa sa miaging tuig hangtud karon, naa lang gihapoy mga tawong wala maleksyon.

Sanglitanan niini ang gibanabanang dul-an ka mga gipangsikop sa kapolisan sa Cebu City sa gihimo nilang Oplan Bulabog niadtong Biyernes sa gabii nga naglaruy-laroy bisan lapas na sa curfew.

Gawas sa mga tawo, makasubo sab nga dunay mga establisamentong wala sab motuman sa mga guidelines nga gihan-ay ug gipasunod sa siyudad alang sa kaluwasan sa ilang mga kustomer gikan sa maong virus nga nipatay og mga ekonomiya sa kanasuran sa kalibotan ug mikalas og kapin usa ka milyong kinabuhi.

Daan ng gipahibalo sa mga otoridad sa Cebu  City ang mga kausaban sa curfew ug mga bag-ong guidelines. Ang curfew makatarunganon kaayo para sa mga hamtong ug sa mga kabataan. Sa mga menor de edad , magsugod ang curfew alas -10 sa gabii hangtud alas-4 sa kaadlawon, samtang alas-12 sa tungang gabii hangtud alas-3 sa kaadlawon sab ang para sa mga hamtong.

Paghatag kini og konsiderasyon sa mga hamtong nga nanarbaho ug maabtan disoras sa gabii , samtang sa mga menor de edad, wala silay legal nga rason nga maglaag-laag bisan lawom na ang kagabhion.

Dili husto nga sawayon ang Cebu City Police Office sa mga tawo diha sa social media sa ilang gihimo tungod kay nagbuhat lang sila sa ilang trabaho subay sa kung unsay kamandoan sa mayor sa dakbayan.

Usa pa, dili lang desisyon sa mayor ang unod sa direktibang gipagawas kondili sinabutan kini sa tanang stakeholders o representasyon sa katilingban apil na niini ang mga business sector, simbahan, kabataan ug uban pa.

Magunsa ra man ng mga direktiba ug guidelines kun dili kini ipatuman sa mga otoridad nga sa pagkakaron naa pa man gihapon ang pandemiya? Wala pa moingon ang gobiyerno nga wala nay hulga sa Covid-19, busa dili magbuotbuot.

Ang kalamposan sa nasud pagbatok aning pandemiya mao lamang gyud ang kooperasyon ug pagtahod sa mga tawo sa mga balaod ug guidelines.

Ang pagkamasinupakon ug kagahi og ulo sa uban maoy usa sa rason kun nganong dili makahuygo og lupad ang Pilipinas.