Tepora misulbong sa big time boxing

CEBU, Philippines — Sa labing unang higayon sa iyang karera, ang Sugboanong featherweight contender nga si Jhack Tepora nakatilaw unsa’y lami nga maapil sa usa ka big time boxing human siya gipasulti atubangan sa bagang panon sa international media didto sa Manila ug Kuala Lumpur atol sa promotional tour sa away nilang Manny Pacquiao ug WBA welterweight champion Lucas Matthysse niadtong Miyerkules ug Biyernes.

Si Tepora nalandig sa main undercard sa gikahinaman nga paghagit ni Pacquiao sa kampiyong si Mathysse karong Hulyo 15 didto sa Kuala Lumpur, Malaysia. Ang pambato sa Omega Gym gikatakda nga makigbinukbukay sa Mehikanong si Edivaldo Ortega alang sa bakanteng IBO featherweight title.

Sa iyang pagsaysay sa dili mahikalimtan niyang kasinatian ngadto ni Dong Secuya sa philboxing.com, si Tepora nagkanayon nga daw sa nagkurog ang iyang mga tuhod kay alang kaniya mas maayo pa nga moaway siya sud sa ring kay sa  pasultion atubangan sa bagang grupo sa mga tinamod nga media sa nagkadaiyang dapit sa kalibotan.

Apan sama sa usa ka sumusulbong nga boksidor, damgo sa 25-anyos nga si Tepora nga mosunod sa lakang sa uban pang mga Pinoy’ng bitoon sama ni Pacquiao.

Ang kompaniya mismo ni Pacquiao nga MP Promotions ang mitawag ni Tepora aron paawayon siya sa maong card human nakadayeg sa gipakitang kamangtas ni Tepora sa miagi niining away didto sa South Africa diin iyang gipakamang si Lusanda Komanisi sud lamang sa duha ka hugna aron madaog  ang WBO Inter-Continental featherweight  belt.

Si Tepora wala pa’y pilde sa 21 ka away nga gidayan-dayanan og 16KOs, apan dili sab kabintahaan ang rekord ni Ortega nga kausa pa lang mapilde sa 28 ka away uban ang 12KOs. Katapusang biktima ni Ortega mao ang kababayan ni Tepora ug kanhi world title challenger nga si Drian Francisco. (BANAT NEWS)