Kadaugan sa Pilipinas

Sama sa atong gituohan, mipabor gayud sa Pilipinas ang internasyonal nga tribunal sa desisyon niini batok sa China kalabot sa kasungian sa teritoryo sa South China Sea. Dako kini nga kadaugan sa Pilipinas tungod kay nagpamatuod kini sa atong katungod sa maong mga isla nga gisurikbot karon sa maong nasud.

Sa desisyon niini, matud sa Permanent Court of Arbitration nga walay "historical rights" ang China sa South China Sea ug nga nakalapas ang maong nasud sa katungod sa Pilipinas pagpahimulos sa teritoryo niini sulod sa exclusive economic zone o EEZ.

Apan buwelta sa China nga dili gayud niini ilhon ang desisyon sa maong tribunal. Sukad pa sa unang panahon, matud sa China nga sakop na kuno niini ang halos tanang lugar sa South China Sea. Gani aduna kini nine dash line nga nagpamatuod nga sakop kuno niini ang SCS.

Apan walay basihan nga nakita ang internasyonal nga tribunal sa pangangkon sa China. Hinuon nakita sa korte nga klarong panglupig lamang ang gihimo sa China sa South China Sea diin daghang mga nasud karon ang naagrabyado, lakip na ang Pilipinas.

Hinuon dakong tabang sa Pilipinas ang pabor nga desisyon sa internasyonal nga tribunal. Nagpasabot kini nga gi-assert lamang sa maong korte ang atong katungod sa atong teritoryo sa South China Sea ilalum atong EEZ nga giangkon sa China.

Samtang ang maong desisyon nagpakita usab sa klaro nga paglapas sa China sa atong teritoryo. Ug  klaro usab nga pagpanglupig ang gihimo niini sa kasilinganang kanasuran tungod kay hinanggaw ug walay basihan ang nine dash line niini.

Ug sa mga mata sa internasyonal nga komunidad, dako nga epekto sa imahe sa China kining maong desisyon sa korte nga nakabase sa The Hague, Netherlands. Kini tungod kay ang maong desisyon nagpalig-on lamang sa ilegal nga pag-okupar sa higanteng nasud sa mga teritoryo sa ubang kanasuran sa South China Sea.

Karon, bisan pa man sa grabeng paugat sa China, dili gayud matuis ang kamatuoran nga ang Pilipinas maoy tinuoray nga tag-iya sa dakong bahin sa South China Sea nga gieskwat niini. Ug dako kini nga lama sa paningkamot sa China nga mamahimong world leader.