Klinika na nameke ng COVID-19 tests, tinanggalan ng lisensya ng DOH
MANILA, Philippines — Tuluyan nang hindi nakapagbukas muli ang isang medical clinic & diagnostic center sa Valenzuela City makaraang bawiin ng Department of Health (DOH) ang license to operate nito matapos itong masangkot sa pamemeke ng COVID-19 results.
Sa desisyon ng DOH-National Capital Region Office (DOH-NCRO), nakita nito na may sapat na basehan ang complaint ni Dr. Alma Radovan-Onia, medical director ng Marilao Medical and Diagnostic Clinic Inc. (MMDCI), laban sa Best Care Medical Clinic & Diagnostic Center Inc. at chief executive officer nito na si Dr. Jovith Royales dahil sa umano’y pamemeke ng records at pagbibigay ng maling impormasyon tungkol sa COVID-19.’
Sa kanyang reklamo, inakusahan ni Radovan-Onia si Royales at ang kanyang mga tauhan na nagpapalabas ng resulta ng COVID-19 na binabayaran ng kanyang mga kliyente habang pinalalabas na ang tests ay isinasagawa sa MMDCI.
Sa ginawang imbestigasyon ng DOH-Health Facilities and Services Regulatory Bureau (HFSRB ), napatunayang hindi accredited COVID-19 testing laboratory ang Best Care dahil tanging ang isang lisensyadong laboratory lamang ang puwedeng mag-report ng resulta sa COVID-19 Document Respiratory System (CDRS).
Ang RT-PCR (reverse transcription-polymerase chain reaction) results na pinalabas ng Best Care kahit wala itong lisensya bilang isang COVID-19 laboratory ay malinaw na paglabag sa RA 11332 lalo sa pamemeke ng records tungkol sa Covid-19.
Nauna nang binigyan ni Valenzuela Mayor Rex Gatchalian ng indefinite suspension ang business permit ng Best Care makaraang makarating sa kanyang kaalaman ang umano’y pamemeke nito ng COVID-19 results gamit ang klinika nito kahit wala itong karapatan bilang isang COVID-19 testing facility.
- Latest