Bill vs ‘no permit, no exam’ pasado na

MANILA, Philippines — Pinagtibay na sa ikatlo at pinal na pagbasa sa Kamara ang panukalang bubuwag sa “no permit, no exam policy” na ipinatutupad sa mga pribadong eskuwelahan sa bansa.

Sa botong 259 pabor ay ganap na napagtibay ang House Bill 7584.

Alinsunod sa panukala, papatawan ng parusa ang mga pribadong eskuwelahan sa elementarya at high school na nagbabawal sa mga estudyante na kumuha ng periodic examination kung hindi pa ang mga ito bayad sa kanilang tuition fees.

Nakasaad sa panukala na kailangan lamang na magsumite ang mga magulang o guardians ng mga estudyante ng promisory note bago ang itinakdang araw ng eksaminasyon.

Samantala pinapayagan naman ang lahat ng pribadong paaralan na i-hold ang mga clearance at transfer credentials ng mga elementary at secondary students na may hindi pa nababayarang pinansiyal na obligasyon na maaring maging dahilan upang ‘di sila tanggapin sa susunod na enrollment.