Rights group binanatan pagmamatigas ni Marcos Jr. 'huwag makipag-usap' sa ICC
MANILA, Philippines — Kinastigo ng Karapatan ang desisyon ni Pangulong Ferdinand Marcos Jr. na mag-"disengage" sa International Criminal Court (ICC), ito pagkatapos ibasura ng huli ang apela ng gobyerno na suspindihin ang imbestigasyon sa madugong "war on drugs" ni dating Pangulong Rodrigo Duterte.
Matatandaang inakusahan ng "crimes against humanity" ang pamahalaan ni dating pangulong Rodrigo Duterte kaugnay ng "war on drugs" na siyang pumatay na sa mahigit 6,000 - 30,000 katao — ang ilan sa kanila, napatay nang walang due process, tinaniman ng ebidensya o hindi kaya'y inosente.
"In a decision dated March 27, 2023 and welcomed by Karapatan, the ICC appeals chamber said the Philippine government failed to provide 'any (persuasive) reasons and arguments in support' of its request for a suspension," sabi ng grupo sa isang pahayag, Martes.
"Marcos Jr.'s intransigence further exposes his government's empty platitudes and rhetoric before the international community that the human rights situation in the Philippines is fine, and that its so-called fully functioning justice system is intent on investigating, prosecuting and punishing the perpetrators of the past regime's bloody war on drugs."
Una nang sinabi ng Appeals Chamber ng ICC na bigo ang Maynila magbigay ng kapani-paniwalang dahilan para isuspindi ang imbestigasyon ni Prosecutor Karim Khan habang nireresolba pa ang over-all appeal ng Pilipinas.
Aniya, hindi napatunayan ng Pilipinas ang iginigiit nitong lack of jurisdiction sa bansa, o na ang kawalan ng legal basis para sa pagpapatuloy ng imbestigasyon ay "kokontra sa pakay nito at lilikha ng sitwasyong hindi na maitatama pa."
Pormal na kumalas ang Pilipinas sa ICC noong ika-17 ng Marso 2019, dahilan para patuloy na igiit ng gobyerno na hindi na dapat makialam ang korte sa bansa. Pero alinsunod sa rules ng international court, sakop pa rin nila ang mga "krimeng" nangyari mula ika-1 ng Nobyembre 2011 hanggang ika-16 ng Marso 2019.
"It is becoming increasingly evident that Marcos Jr. has no intentions of exacting justice and accountability from the perpetrators and in fact, maintains the same policies and the same climate of impunity that had led Duterte and his minions to get away with murder," panapos ng Karapatan.
Hunyo 2022 lang nang mangako si Justice Secretary Jesus Crispin Remulla nsa United Nations Human Rights Council na gumagawa ang administrasyong Marcos ng "deeply human approach" sa law enforcement, at na gagamit lang ang Philippine National Police ng pwersa kung kinakailangan.
Sa kabila ng lahat ng ito, Pebrero lang nang sabihin ni Bongbong na "banta sa soberanya" ang imbestigasyon ng ICC sa drug war ni Digong. Kilalang bise presidente ni Marcos Jr. ang anak ni Duterte na si Sara Duterte-Carpio. — James Relativo
- Latest
