Driver ng EDSA Busway carousel na naniningil ng pasahe, binalaan ng LTFRB
MANILA, Philippines — Binalaan ng Land Transportation Franchising and Regulatory Board (LTFRB) na paparusahan at pagmumultahin ang sinumang driver na mapapatunayang naniningil pa rin ng pasahe sa mga pasahero ng EDSA Busway carousel.
Ang pahayag ay ginawa ng LTFRB nang makarating ang sumbong sa ahensiya na mayroon pa ring naniningil na driver bagamat 24 oras na libre ang pagsakay dito ng publiko sa buong buwan ng Disyembre.
Ayon sa LTFRB, pinaiimbestigahan na ng tanggapan ang naturang ulat.
Nanawagan din ang LTFRB sa mga commuters na isumbong agad sa ahensiya ang mga ganitong insidente upang mapanagot ang mga driver na patuloy na nagsasamantala sa kanilang mga pasahero.
Una nang inanunsyo ng LTFRB na sa buong Disyembre ngayong taon ay 24/7 libre ang sakay sa EDSA Busway Carousel upang mabawasan ang gastusin ng publiko ngayong holiday season.
May naipakalat na ring mga elemento ng LTFRB at Inter-Agency Council on Traffic (I-ACT) sa bawat istasyon ng EDSA Busway para pangalagaan ang kapakanan ng mga pasahero at malaman ang mga lugar na may mataas na demand sa sasakyan para madagdagan ang bilang ng mga unit na magsasakay sa mga pasahero.
- Latest