Comelec Chair Garcia, Nograles sa CSC lusot na sa CA

MANILA, Philippines — Lusot na sa makapangyarihang Commission on Appointments (CA) ang nominasyon para sa kumpirma­syon nina Commission on Elections (Comelec)  Chairman George Erwin Garcia at Karlo Alexei Nograles bilang chairman ng Civil Service Commission (CSC).

Mahigit isang oras lamang ang itinagal ng mga pagtatanong at pagbusisi ng panel kay Garcia. Hindi rin nakaapekto sa kanyang kumpirmasyon ang naghain ng oposisyon laban kay Garcia na si Leonor Barcelon-Whale kaugnay sa isang condominium unit sa Makati City na nirentahan ng opisyal, at ibinenta na kalaunan ay ibinasura rin ng korte.

Nangako si Garcia sa panel na sisikapin niyang higitan ang magandang resulta ng 2022 elections para sa mga susunod na halalan.

Samantala, ibinahagi ni Nograles sa panel ang malawak na karanasan bilang abogado at public servant sa panunungkulan niya bilang Davao City lawmaker, House appropriations committee chairperson, at tagapagsalita ng Inter-Agency Task Force on Emerging Infectious Diseases sa ilalim ng Duterte administration.

Sa nasabing pagdinig, sinagot niya ang mga tanong tungkol sa rightsizing ng government workforce at siniguro ang benepisyo para sa contractual at job order workers.

Dahil dito kaya inirekomenda ni Senate President Juan Miguel Zubiri na aprubahan ang appointment ni Nograles.

Matatandaan na si dating Pangulong Rodrigo Duterte ang nag-nominate kay Nograles para sa CSC top post.