PNP, ‘di papayag makausap ng US lawmakers si De Lima

MANILA, Philippines — Hindi papayagan ng Philippine National Police (PNP) ang mga mambabatas mula sa Amerika na pinamumunuan ni Senator Edward Mackey na makausap ang nakakulong na si dating senador Leila De Lima kung plano nila itong bisitahin sa custodial center ng PNP.

Ito ang binigyan diin ni PNP Public Information chief Brig. Gen. Roderick Augustus Alba, bagamat sinabi nito na ibibigay nila ang mga kailangang gawin at tulong sa mga bisitang mga dayuhang mambabatas.

Aniya, handa na ang Headquarters Support Service na i-tour ang mga mambabatas mula Amerika upang tignan ang kon­disyon ng kulungan subalit hindi ang makausap ng harap-harapan si De Lima.

Kinakailangang hu­mingi ng permiso ang mga US lawmakers sa korte upang madalaw at makausap ang isang Person Under Police Custody (PUPC).

Bukod dito ay pagsunod din sa health and safety protocols dahil sa COVID-19.

Nasa 15 aktibong kaso kasi ng COVID sa PNP at isang bagong kaso sa Camp Crame ang naitala kahapon.

Napag-alaman na plano sanang bisitahin kahapon ng mga mambabatas mula sa Amerika si De Lima na halos 2,000 araw ng nakakulong dahil sa kasong iligal na droga.

Subalit ilan sa mga drug lords na nag-akusa at tumestigo sa kanya ay bumaligtad na at inurong na ang akusasyon laban sa dating senadora.

Samantala sinabi naman ni PNP Spokesperson Police Col. Jean Fajardo na ipinaliwanag naman ang tamang protocol sa mga foreign lawmaker na naintindihan naman umano ng mga ito.