‘Wag magbababa ng face mask – DOH
Sa balik-eskwela ng mga estudyante
MANILA, Philippines — Mahigpit ang bilin ng Department of Health (DOH) sa mga mag-aaral na magbabalik sa mga paaralan sa ‘face-to-face classes’ na huwag tatanggalin ang suot ng face mask kasunod ng pag-amin ng departamento na mahihirapan na magpatupad ng ‘social distancing’ sa mga klase.
Sinabi ni Health officer-in-charge, Undersecretary Maria Rosario Vergeire na kailangan nang mamuhay ang mga Pilipino na kasama ang virus kaya mas kinakailangan ngayon ang ‘commitment’ ng bawat isa na proteksyunan ang mga sarili.
Bukod dito, kailangan din na mahigpit na ipatutupad ng mga paaralan ang palagiang paghuhugas ng kamay ng mga estudyante, pagsa-sanitize ng alcohol at pagkuha ng kanilang mga temparatura.
Kasunod nito, hinikayat ni Vergeire ang mga estudyante at maging mga magulang nila na magpabakuna na laban sa COVID-19, maging ang mga guro at iba pang empleyado ng mga paaralan.
Kailangan din na magtalaga at magsanay ang mga paaralan ng kanilang ‘safety officers’ na siyang may responsibilidad sa pagsunod ng lahat sa health protocols.
Una nang sinabi ng OCTA Research Group na hindi maiiwasan ang COVID outbreak sa mga paaralan sa pagbabalik ng ‘face-to-face classes’.
- Latest