Solidum, itinalagang kalihim ng DOST

MANILA, Philippines — Itinalaga ni Pangulong Ferdinand Marcos Jr. si Renato Umali Solidum Jr. bilang kalihim ng Department of Science and Technology.

Kinumpirma ni Press Secretary Trixie Cruz-Angeles ang ginawang paghirang kay Solidum sa kanyang bagong posisyon.

“Siya ay isang geologist na nagtrabaho sa Phivolcs at kasalukuyang Undersecretary ng DOST para sa Disaster Risk Reduction at Climate Change Adaptation,” ani Angeles.

Samantala, pinangalanan ni Marcos ang nasa 80 bagong miyembro ng Bangsamoro Transition Authority (BTA).

Karamihan sa mga ito ay binubuo ng mga abogado, lawyer-certified public accountant, inhin­yero, guro, doktor, arkitekto, media practitioner, politiko, dating halal na opisyal sa lokal na antas, at mga burukrata ng gobyerno.

Sila ang mga kinatawan mula sa mga lalawigan ng Maguindanao, Lanao del Sur, Lanao del Norte, Sulu, Basilan, at Tawi-Tawi, gayundin ang mga miyembro ng komunidad ng Bangsamoro sa North Cotabato, mga katutubo na hindi Moro, Kalagan o Kagan. komunidad sa Davao Oriental, at mga komunidad ng Kristiyano o settler sa Davao City at Cotabato City.

Ang BTA ay pinangu­ngunahan ng Moro Islamic Liberation Front na may 41 nominado at 39 mula sa gobyerno.