P2-B fund para sa mga taong 'nasa sitwasyon ng krisis' ilalabas na
MANILA, Philippines — Inaprubahan ng Department of Budget and Management (DBM) nitong Lunes ang pagbibigay ng P2 bilyon para sa Department of Social Welfare and Development (DSWD) na siyang gagamitin bilang tulong-pinansyal sa mga Pilipinong nasa sitwasyon ng krisis.
Sa isang pahayag ng ahensya, sinabing inaprubahan ni DBM Secretary Amenah Pangandaman ang Special Allotment Release Order na nagkakahalaga ng P2 bilyon bilang bahagi ng Assistance to Individuals in Crisis Situation (AICS) ng DSWD na siyang bumubuo sa parte ng Protective Services for Individuals and Families in Difficult Circumstances.
“Ang pondo ng taumbayan, dapat [m]apakinabangan rin ng taumbayan lalo na sa oras ng peligro. The release of this fund is a big help to our kababayans who are caught in difficult situation,” saad ni Pangandaman sa isang pahayag, Martes.
“Maganda ang timing ng karagdagang pondong ito. Gusto nating tulungan ang DSWD para makapagbigay ng tulong at proteksyon sa mga pamilyang nangangailangan,” pagpapatuloy niya.
Anang ahensya, ang AICS ay isang probisyon ng pinagsama-samang serbisyo na kinabibilangan ng tulong pinansyal para sa transportasyon, medikal, libing, pagkain at iba pang support services na ibinibigay sa mga indibidwal at pamilyang may kinahaharap na krisis.
Pagbabahagi pa nila, sa ika-30 ng Hulyo ngayong taon, pumalo na sa 1.5 milyon indibidwal ang naging bahagi na ng AICS program na siyang lampas sa target nilang 1.4 milyon.
Anila, may natititra pang 642, 348 kliyente ang mungkahi nilang mapabilang sa naturang programa ngayong taon.
“Patunay ito na binibigyan prayoridad ng pamahalaan ang pagtulong sa mga vulnerable at disadvantaged sectors. Hindi lip service and sinabi ng Pangulo na walang Pilipino ang maiiwan,” sambit ni Pangandaman. — Philstar.com intern Vivienne Audrey Angeles
- Latest