10 pm nationwide curfew sa menor-de-edad, isinulong

MANILA, Philippines — Muling inihain sa Kongreso ni Bagong Henerasyon Rep. Bernadette Herrera- Dy ang bill na pagpapatupad ng curfew sa mga menor-de-edad.

Sa ilalim House Bill 1016, layong ipagbawal ang paggala ng mga menor-de-edad mula alas-10 ng gabi hanggang alas-5 ng umaga.

Ayon kay Herrera-Dy, hindi lamang pagbabawal ito sa mga minors kundi proteksiyon laban sa iba’t ibang kriminalidad.

“The bill seeks to mandate and strictly implement a set of hours during night time within which minors are prohibited from remaining outside of the home not only as a means of maintaining public order and safety and preventing the further rise in criminality but also in order to protect minors from potential threat that may arise in the remote environment which may be harmful or detrimental to their development,” ani Herrera-Dy.

Nabatid na sa ilalim ng “National Curfew Act”, pinapayagan ang ilang exemptions kabilang na ang palabas ng minor na kasama ang magulang o guardian o during emergency.

Hindi rin mapaparusahan ang minors kung siya ay pauwi na galing party, graduation o religious activities kung mapapatunayan na pinayagan.

Sa ilalim ng proposed bill ni Herrera Dy, ang menor- de-edad na mahuhuli ay ikokustodiya at kakapkapan ng pulis na pareho ng kanyang kasarian.

May parusa na 48-oras na community service at P2,000 sa unang offense habang dadalo naman sa Barangay Council for the Protection of Children ang minor at magulang at pagkakaroon na ng intervention ng local DSWD sa pamamagitan ng counselling sa ikatlong paglabag.