DOJ, handang ibigay ang datos sa ‘drug war’ sa CHR

MANILA, Philippines — Handa umano ang Department of Justice (DOJ) na ibigay sa Commission on Human Rights (CHR) ang lahat ng datos na nakalap sa imbestigasyon sa “war on drugs” ng nakaraang administrasyong Duterte.

Bukod dito, magbibigay rin ang DOJ ng impormasyon sa “investigating team” ng International Criminal Court (ICC) bilang kortesiya at hindi dahil sa kinikilala nila ang awtoridad nito.

Samantala, hindi pa naman pinapangalanan ni Pangulong Ferdinand Marcos Jr. ang bagong mga komisyuner ng CHR.

Una nang sinabi ni CHR executive director Jacqueline de Guia na ang aksyon ng komisyon ay para sa kolaborasyon at hindi nakakapinsala sa pamahalaan.

Isa sa nagiging problema sa imbestigasyon ng DOJ sa sinasabing mga “extra-judicial killings” ay ang kakulangan o kawalan ng testigo na nais lumantad.

Sinabi naman ni Justice Undersecretary Jesse Hermogenes Andres na anim sa 52 kaso na nirerebyu ng DOJ ay naibasura na makaraang tumanggi na ang pamilya ng mga biktima na makipagtulu­ngan sa imbestigasyon.

Sa kabila nito, iginiit ni Remulla na walang sinasanto ang DOJ ukol sa kung may direktang nag-utos na patayin ang mga drug suspect sa mga operasyon.