Unemployment rate tumaas sa bagong graduates

MANILA, Philippines — Isa sa hahanapan ng solusyon ng bagong pamunuan ng Department of Labor and Employment (DOLE) ang mas tumaas na unemployment rate sa bansa na umakyat sa 6% nitong Hunyo na posibleng dulot umano ng nadagdag na mga bilang sa lakas-paggawa dahil sa mga bagong graduates.

Sa datos ng Philippine Statistics Authority (PSA), nasa 2.93 milyong Pilipino ang walang trabaho nitong katapusan ng Mayo. Mas mataas ito ng 0.3% sa 5.7% rate noong April pero mas mababa naman sa 7.7% noong Mayo 2021.

Nangangahulugan umano ito na 94 sa kada 100 indibidwal sa labor force ay may trabaho, ayon pa sa PSA.

“Itong mga fresh grads kasama dyan, ­naghahanap ng trabaho, di kaagad nakakita ng trabaho,” katwiran ni Labor Secretary Bienvenido Laguesma.

Isa pang pinoproblema niya ngayon ay ang 14.5% underemployment rate o ang mga nagtatrabaho ng hindi akma sa kanilang kakayahan o edukasyon.

Pinangangambahan rin ni Laguesma ang posibleng pagbabalik ng mas mahigpit na restriksyon sa ekonomiya lalo na at patuloy na tumataas ang mga kaso ng COVID-19 lalo na sa Metro Manila.