'Dasurv': Korte Suprema sinuspinde, pinagmulta ng P50k 'homophobic' judge
MANILA, Philippines — Suspendido ng Korte Suprema ang isang hukom matapos magbitaw ng mga “homophobic slurs” sa kanyang mga litigante.
In-adopt ng High Court sa 18-page decision — na iniakda ni Associate Justice Alfredo Benjamin Caguioa — ang findings at rekomendasyon ng Judicial Integrity Board laban sa homophobic remarks ni Presiding Judge ng Jorge Emmanuel Lorredo ng Manila Metropolitan Trial Court, Branch 26.
Ipinagpilitin kasi niya ang kanyang religious beliefs habang isinasagawa ang kanyang judicial functions.
Taong 2019 nang magsampa ng reklamo ang mga litiganteng sina Marcelino Espejon at Erickson Cabonita matapos magpakita ang respondent judge ng "bias and partiality" dahil sa sexual orientation ng dalawa.
Anila, paulit-ulit silang tinanong patungkol sa kanilang sekswalidad at sinabing "kasalanan" ang homosexuality.
"[P]agka-bad[i]ng, tomboy, lesbian, ayaw ng Diyos yun," saad ng judge.
“So pag meron kang lesbian relationship, paparusahan 'yung anak mo. Dengvaxia, di ba? [Kayo din] kasi may kasalanan kayo sa Diyos eh," hirit pa niya.
Anang SC, walang lugar sa hudikatura ang pagbibigay ng "inappropriate statements" dahilan para lumabag ang hukom sa New Code of Judicial Conduct na siyang nagtitiyak ng patas na trato ng korte sa lahat anuman ang lahi, kasarian, relihiyon, edad, sekswal na oryentasyon, katayuan sa lipunan at ekonomiya.
Bukod dito, nilabag din ng hukom ang Civil Service Commission Resolution No. 01-0940 o ang Administrative Disciplinary Rules on Sexual Harassment Cases na mungkahing patawan ng parusa ang sinumang gumawa ng work-related sexual harassment na siyang magdudulot ng "discrimination, insecurity, discomfort, offense or humiliation" sa biktima.
Dagdag pa rito, kinastigo rin ng Korte ang hukom dahil sa "paggamit niya ng kasulatan at katuruan sa Bibliya" sa kanyang mga litigante. Batay sa press release, inamin ng hukom na nasa 101 kaso ang kanyang naayos sa pamamagitan ng Bibliya.
"The Court held that respondent judge failed to fulfill his duty to not only act with impartiality but to appear impartial at all times," saad ng SC.
"As 'front-liners who serve as the visible representations of the judicial branch at the grassroots level,' judges must avoid not only impropriety but the appearance of impropriety."
30 araw na suspendido ang hukom dahil sa reklamong less grave offense of sexual harassment. Pinagmumulta rin siya ng P50,000 dahil sa “simple misconduct and conduct unbecoming of a judge.”
'The Judiciary Walks with Pride'
Nito lamang Hunyo nang inorganisa ng Korte Suprema ang "The Judiciary Walks with Pride,” isang event na ginawa bilang pakikiisa sa selebrasyon ng Pride Month.
Sa isang mensahe ni Chief Justice Alexander Gesmundo, binigyang-diin ang kahalagahan ng pagbibigay kalayaan sa lahat ng tao.
"The Constitution guarantees that no person should be deprived of liberty and denied the equal protection of the laws…The Constitution is a covenant that any person is assured of due process and equal protection, without distinction, without discrimination,” wika niya.
“I believe that these constitutional provisions arise from the basic premise that we are all human beings, each entitled to respect and a life lived with dignity,” sambit niya pa habang binibigyang-diin ang importansya ng pagkakaiba-iba: "[S]trive for inclusivity, with a reminder that “the Court will never condone intolerance and bigotry.” — Philstar.com intern Vivienne Audrey Angeles
- Latest
- Trending
