Ayuda sa middle class, kinontra ni Tulfo
MANILA, Philippines — Mariing tinutulan ni Senator-elect Raffy Tulfo ang panawagan sa gobyerno na bigyan ng ayuda ang middle class sa gitna ng patuloy na pagtaas sa presyo ng mga produktong petrolyo at mga pangunahing bilihin.
Ayon kay Tulfo, kailangang pag-aralan muna ang pagbibigay ng tulong sa middle class, habang yes na yes naman para sa mga mahihirap.
Paliwanag pa niya, kaya namang pasanin ng mga middle class ang epekto ng inflation dahil mas mataas naman ang suweldo ng mga ito kumpara sa mga ordinaryong manggagawa.
Sa kasalukuyan, umaabot umano sa 8 milyong Filipino na ang tumatanggap ng minimum na suweldo kaya dapat lang na sila ang unahing tulungan ng gobyerno.
Sinabi pa ni Tulfo, na susunod na chairman ng Senate committee on labor sa papasok na 19th Congress, maghahain siya ng panukala na reresolba sa problema ng wage theft.
Ito ay dahil sa loob umano ng 20 taon ay lagi siyang nakakatanggap ng mga reklamo mula sa mga manggagawa na dinudugasan o iniisahan ng kanilang mga employers na hindi mga nakatatanggap ng tamang suweldo, habang ang iba ay minamaltrato pa at napapagkaitan ng required minimum wage at mga benepisyo sa kabila ng umiiral na batas para dito.
- Latest