Airlines magpapataw ng fuel surcharge simula Hulyo 1
MANILA, Philippines — Nakatakdang magpataw ng fuel surcharge ang Civil Aeronautics Board (CAB) simula Hulyo 1, 2022 na aabot sa P355.00 hanggang P1,038.00 dahil sa patuloy na pagtaas ng presyo ng jet fuel sa world market.
Inihalimbawa ni CAB Hearing Examiners Division Chief Atty. Blem Moro sa Laging Handa public briefing, ang biyahe ng eroplano mula Manila patungong Cebu na magkakaroon ng dagdag na singil na P706.
“Many airlines, especially our local airlines, have applied surcharges, including Cebu Pacific and Philippine Airlines, as well as foreign carriers,” ani Moro.
Paliwanag ni Moro, ang surcharges na ibabatay sa layo ng biyahe ay applicable sa domestic at international flights.
Sinabi ni Moro na binago ng CAB ang surcharge matrix nito kasunod ng pagtaas ng presyo ng gasolina sa world market noong nakaraang taon.
Sa pagsusuri ng matrix noong Abril at Mayo, ang presyo ng gasolina ay nasa $155 kada bariles, kung saan ang Philippine peso-US dollar exchange rate ay nasa P52:$1.
Gayunpaman, ang base fare naman aniya ay hindi gumagalaw habang ang mga airline company ay patuloy pa naman sa kanilang alok na promosyon at murang pamasahe.
“’Yun lamang po naidaragdag ang ating mga fuel surcharge, depende po ito sa galaw din ng merkado at kung magkano ang nagiging presyo ng fuel sa pandaigdigang pamilihan,” aniya pa.
- Latest