Higit P4 taas sa diesel, P1.70 sa gasolina nakaamba
MANILA, Philippines — Nagbabadya na naman ang panibagong round ng big-time hikes sa mga presyo ng mga produktong petrolyo sa bansa sa susunod na linggo.
Sa fuel price forecast para sa June 14 hanggang 20 trading week, sinabi ng UniOil na ang presyo kada litro ng diesel ay maaaring tumaas ng P4.30 hanggang P4.50 habang ang presyo naman ng gasolina ay maaaring madagdagan ng P1.50 hanggang P1.60 kada litro.
Ayon naman sa isang oil industry source, maaaring ang presyo ng diesel ay tumaas sa pagitan ng P4.20 at P4.50 kada litro habang ang gasolina ay maaaring tumaas ng P1.40 hanggang P1.70 kada litro.
Nangangahulugan ito na ang presyo ng diesel ay makakapagtala na ng mahigit P10 pagtaas sa nakalipas lamang na dalawang linggo, matapos na magtaas ng higit P6.00 kada litro noong Martes.
Samantala, ang presyo naman ng kerosene ay maaaring tumaas din ng P4.75 hanggang P5 kada litro.
Una nang sinabi ng Department of Energy (DOE) na inaasahan na nilang magpapatuloy pa sa pagtaas ang presyo ng mga produktong petrolyo sa mga susunod na linggo bunsod na rin ng patuloy na giyerang nagaganap sa pagitan ng mga bansang Ukraine at Russia, pagtanggi ng European countries na umangkat ng langis mula sa Russia, summertime sa northern hemisphere countries at pagluluwag ng lockdowns sa China.
- Latest