Villar atras sa Senate ­presidency, susuportahan si Zubiri

MANILA, Philippines — Hindi na interesado si Sen. Cynthia Villar sa Senate Presidency (SP) sa papasok na 19th Congress.

Ayon kay Villar, wala ng SP race at hindi na ito interesado pa sa pwesto.

Ang pahayag ay ginawa ng senador sa tanong kung susuportahan ba niya si Majority leader Juan Miguel “Migz” Zubiri na interesado rin sa Senate presidency.

Giit ni Villar, napag-usapan na nila ito ni Zubiri nang magkita sila sa Commission on Appointments hearing nitong Miyerkules ng umaga.

Nauna na ring sinabi ni Zubiri na ang karanasan niya bilang mambabatas ang lamang niya sa iba pang aspirants para ­maging Senate president.

Bukod naman kay Zubiri, nauna na ring inihayag ni Sen. Sonny Angara na interesado rin sa Senate presidency sina Senators Win Gatchalian, Chiz Escudero at Loren Legarda.