Pangingikil ng CPP-NPA napatigil ng NTF-ELCAC, local officials – DILG

MANILA, Philippines — Naniniwala ang National Task Force to End Local Communists Armed Conflict (NTF-ELCAC) na malaki ang naging papel ng mga local officials upang  matigil ang pangingikil ng mga komunistang-terorista sa mga pulitiko sa nagdaang halalan.

Ito  ang  sinabi ni Department of the Interior and Local Government (DILG) UnderSecretary Jonathan Malaya sa virtual press briefing ng NTF-ELCAC dahil tagumpay ang pagtigil sa pananakot na ginagawa ng mga rebelde.

Sinusugan ni Malaya ang ulat ni DILG Secretary Eduardo Año kay Pangulong Rodrigo Duterte na walang mga pulitiko o local government unit (LGU) officials na pumayag at bumigay sa pangingikil o ‘permit to campaign’ ng Communist Party of the Philippines-New People’s Army-National Democratic Front (CPP-NPA-NDF).

Ani Malaya, magandang report ito sa Pangulo lalo pa at dinagdagan ang warning bago pa maghalalan na mananagot ang sinoman na bumigay sa ‘demand’ ng CPP-NPA-NDF na paglabag ng Republic Act 10168, kilala bilang “Terrorism Financing Prevention and Suppression Act of 2012”, Section 261 ng Omnibus Election Code at Article 137 ng Revised Penal Code or the Disloyalty of Public Officers.

Dagdag pa ni Malaya, layunin ng task force na wakasan ang pagmamalabis ng mga komunistang-terorista at maisagawa ng maayos at payapa ang May 2022 elections.