Illegal e-sabong, naglipana - PAGCOR
MANILA, Philippines — Matapos suspindihin ng pamahalaan ang operasyon ng e-sabong sa buong bansa, naglipana naman ngayon ang illegal online sabong.
Ayon kay PAGCOR E-Gaming Licensing and Regulation Vice-President Atty. Jose Tria, namonitor nga nila na naglabasan muli ang illegal e-sabong matapos suspindihin ang operasyon nito dahil sa utos na rin ni Pangulong Rodrigo Duterte.
Kabilang umano sa mga namamayagpag na iligal online sabong website ay ang pinassabong.live; pclive1.com; sabong-express.net; phbetting.live; goperya.com; phbet44.bet; phbet.bet; phbetr.bet.
Sinabi ni Tria, batid nila na kapag sinuspinde ang operasyon ng online sabong ay mag-i-iligal operation ang iba at sasamantalahin ang pagkakataon para kumita.
Ani Atty. Tria, nalulungkot sila na napupunta lang sa mga may-ari ng mga illegal e-sabong ang milyon-milyong kita nila araw-araw pero walang napupunta sa gobyerno.
Inihayag pa ni Atty. Tria na inimpormahan na nila ang mga awtoridad hinggil sa ilegal na operasyon ng e-sabong at ngayon ay naghihintay na lamang sila ng kanilang action.
“We have already informed the authorities. We are just waiting for their action,” aniya.
Inamin ng PAGCOR na daan-daang milyon ang kinikita nila sa e-sabong buwan-buwan at malaki ang naitulong nito sa pamahalaan lalo na noong kasagsagan ng pandemya.
Magugunita na noong nakalipas na buwan ay iniutos ng Pangulong ‘Digong’ sa PAGCOR na suspindihin ang e-sabong operation sa bansa dahil nakakasira na sa buhay ng maraming Pinoy.
- Latest