Poll workers na nag-OT dahil sa palpak na VCMs, bayaran
MANILA, Philippines — Hinikayat ng isang grupo ng mga guro ang Commission on Elections (Comelec) na pagkalooban ng karagdagang bayad ang mga poll workers na napilitang mag-overtime dahil sa mga pumalpak na vote-counting machines (VCMs) nitong katatapos na halalan.
Una nang kinumpirma ng Comelec na mahigit 1,800 VCMs ang dumanas ng iba’t ibang aberya na nagresulta sa pagkaantala ng botohan, na pinangangasiwaan ng mga guro, na nagsilbi bilang board of elections inspectors (BEIs).
Ayon kay Alliance of Concerned Teachers (ACT) secretary general Raymond Basilio, na ang poll body at iba pang ahensiya ng pamahalaan ay dapat na mag-exert ng efforts upang mabigyan ng hustisya ang mga hard-working na miyembro ng electoral board.
Nabatid na may ilang guro ang napilitang mag-duty ng mahigit 24-oras sa halalan habang mayroon ring guro na nawalan ng malay matapos masobrahan ng hirap sa pagtatrabaho.
Una nang inaprubahan ng Comelec na taasan ang honoraria ng mga poll workers sa halalan ngayong taon dahil inaasahang mas mahaba ang kanilang gagawing pagsisilbi sa halalan dulot ng COVID-19.
Matatandaang higit sa 647,000 teaching at non-teaching personnel mula sa DepEd ang naatasang magsilbi sa eleksiyon ngayong taon.
- Latest