DOH: 3.6 milyong napanis na COVID-19 vaccine doses papalitan ng COVAX
MANILA, Philippines — Hindi kailangang maglabas ng pera ng gobyerno para mapalitan ang higit 3.6 milyong doses ng COVID-19 vaccines na nag-expire sa Pilipinas — papalitan kasi ito nang libre ng COVAX facility, ayon sa Department of Health (DOH).
Sinabi ito ni Health Secretary Francisco Duque III sa iniereng talumpati ni Pangulong Rodrigo Duterte sa state media, Miyerkules, habang ipinapaliwanag na nakipagkita na sila sa mga kinatawan ng vaccine-sharing alliance.
Ang COVAX facility ay ginawa para tiyaking makararating ang bakuna kahit sa mahihirap na bansa.
"'Yung COVAX, meron po silang stockpile ng mga bakuna with longer shelf life. So ang gagawin po, 'yung mga nag-expire na sa atin, umabot na ng mga about 3.6 million doses, which is just about 1.46% of our total inventory ng bakuna," ani Duque kay Digong.
"So, yes sir, papalitan po 'yan. Ire-replace po ng COVAX facility... Wala pong cost."
Paliwanag pa ng kalihim ng DOH, ipinapakiusap din nila ngayon na maging sakop nito hindi lang ang mga bakunang donasyon ngunit kahit ang mga prinocure talaga basta't nag-expire.
Nag-aantay na lang daw sila ng tugon pagdating doon.
Nangyayari ito ngayong bumababa nang husto ang COVID-19 cases sa Pilipinas ngayong sumadsad sa 123 lang ang bagong kaso kahapon.
Sa kabila nito, bumababa rin ang bisa ng mga bakunang naiturok na sa mga tao noong mga nakaraang buwan, dahilan para sabihin ng health experts na hindi dapat makampante at kumuha ng booster shots.
Lunes lang nang magsimula ang pamimigay ng ikalawang COVID-19 booster shots ng gobyerno para sa mga immunocompromised kaugnay niyan.
"It's nice of them [COVAX] to [replaced the expired vaccines for free]. It's a distinct humanitarian sentiment," tugon naman ni Duterte.
Aabot na sa 67.4 milyong katao ang natuturukan ng COVID-19 vaccines sa Pilipinas nitong Lunes. Sa bilang na 'yan, 12.9 milyon pa lang ang nakakukuha ng booster shots. — James Relativo
- Latest
