'3-day double pay': Magtratrabaho sa April 9, Holy Week may dagdag sahod

MANILA, Philippines — Nagpaalala ang Department of Labor and Employment (DOLE) sa mga employers na magbigay ng dagdag na sahod sa mga manggagawa't empleyado simula Sabado at sa Mahal na Araw — sunud-sunod kasi ang holidays.

Araw ng Kagitingan (regular holiday) kasi sa ika-9 ng Abril — maliban pa sa Huwebes Santo (regular holiday), Biyernes Santo (regular holiday) at Sabado de Gloria (special non-working holiday) sa susunod na linggo, sabi ng labor advisory 8 series of 2022 ng DOLE.

Ayon kay Labor Secretary Silvestre Bello III, "double-pay" dapat ang mga kakayod pa rin tuwing regular holidays gaya ng April 9, 14 at 15. Kahit na hindi siya pumasok, bayad pa rin dapat ang empleyado.

"For work done during the regular holiday, the employee shall be paid a total of 200% of his/her wage for that day for the first eight hours [(Basic wage + COLA) x 100%]," ayon sa dokumentong inilabas ng DOLE noong Biyernes.

"If the employee did not work, he/she shall be paid 100% of his/her wage for that day, subject to certain requirements under the implementing rules and regulations of the Labor Code, as amended. [(Basic wage + COLE) x 100%]."

Para sa mga mag-o-overtime tuwing regular holidays, kailangang bayaran ang mga empleyado ng 30% ng kanilang hourly rate sa mga araw na 'yon. Ibig sabihin: Hourly rate ng basic wage x 200% x 130% x bilang ng oras na trinabaho.

Iba naman ang iskema ng bayaran kung magtratrabaho ang manggagawa tuwing regular holiday kahit na off-duty siya dapat (rest day). Mas malaki: [(Basic wage + COLA) x 200%] + [30% (Basic wage x 200)].

Lalong lolobo ang sasahurin ng isang empleyado kung rest day na nga niya, nagtrabaho pa ng holiday at nag-overtime na: Hourly rate ng basic wage x 200% x 130% x 130% x bilang ng oras na trinabaho.

Bayad sa Sabado de Gloria iba

Bagama't apat na holidays ang mangyayari sa mga susunod na araw, hindi double pay ang maiuuwi ng mga magtratrabaho sa Black Saturday. Iba kasi ang pagkwenta kapag special non-working holidays.

"No work, no pay" ang iiral sa araw na ito kung hindi pumasok ang empleyado, maliban na lang kung ibinibigay ito sa ilalim ng collective bargaining agreement (CBA) sa pagitan ng mga manggagawa at kapitalista.

"For work done during the special day, he/she shall be paid an additional 30% of his/her basic wage on the first eight hours of work [(Basic wage x 130%) COLA]," dagdag pa ni Bello.

"For work done in excess of eight hours (overtime work), he/she shall be paid an additional 30% of his/her hourly rate on said day (Hourly rate of the basic wage x 130% x 130% x numbers of hours worked)."

Para sa mga magtratrabaho sa araw na 'yon kahit rest day nila, makakukuha sila ng dagdag 50% ng kanilang basic wage para sa unang walong oras ng trabaho.

Kung OT ka tuwing special day pero rest day mo na nga, dadagdagan ang sweldo mo ng 30% ng iyong hourly rate sa araw na 'yon: hourly rate ng basic wage x 150% x 130% x bilang ng oras na trinabaho. — James Relativo