17 volcanic quakes naitala sa Taal
MANILA, Philippines — Nakapagtala kahapon ang bulkang Taal ng 17 volcanic earthquakes sa nakalipas na 24-oras.
Batay sa inisyung latest bulletin ng Phivolcs, nabatid na kabilang dito ang apat na volcanic tremor events na tumatagal ng mula isa hanggang dalawang minuto, at 13 low-frequency volcanic earthquakes
Ayon sa Phivolcs, may naganap din na upwelling ng mainit na volcanic gas sa lawa ng Main Crater na lumikha ng plume na may taas na 900 metro na napadpad sa timog-kanluran.
Kasalukuyan pa ring nakataas ang Alert Level 3 (Magmatic unrest) sa Taal Volcano.
Babala ng Phivolcs na sa kalagayang ito, ang magma na nanunuot sa ilalim ng Main Crater ay maaaring magdulot ng karagdagan o malakas na pagputok.
Mariin ding iminumungkahi ng DOST-Phivolcs sa lahat na lumikas mula sa Taal Volcano Island (TVI) at mga high-risk barangays ng Bilibinwang at Banyaga, Agoncillo at Boso-boso, Gulod at silangang bahagi ng Bugaan East, Laurel, Batangas dahil sa panganib ng pyroclastic density currents at volcanic tsunami kung sakaling magkaroon ng malakas na pagputok.
Hinihikayat din ng Phivolcs ang mga residente sa paligid ng Taal Lake na maging mapagmatyag at mag-ingat dahil sa posibleng ashfall at fog at laging handa sa posibleng evacuation sakaling ang aktibidad ng Taal ay lumala.
- Latest