Apektado ng pagputok ng Bulkang Taal lagpas 7,000 na — NDRRMC
MANILA, Philippines — Lalo pang dumami ang bilang ng apektado ng pagputok ng Bulkang Taal noong nakaraang weekend, dahilan para lumobo pa lalo ang mga lumikas patungo sa mga evacuation centers.
Ayon sa huling taya ng National Disaster Risk Reduction and Management Council (NDRRMC), Huwebes, aabot na sa 7,237 katao ang naapektuhan ng nasabing pagsabog noong Sabado dahilan para itaas ng Phivolcs ang bulkan sa Alert Level 3.
Katumbas ito ng 2,047 pamilya sa ngayon mula sa rehiyon ng Calabarzon. Sinasabing nasa 20 lungsod at munisipalidad ang apektado ngayon, kasama na ang 18 baranggay.
Kabilang na riyan ang 6,117 na kinailangang lumikas (displaced persons) mula sa kanilang mga tahanan:
- nasa evacuation centers (4,165)
- nasa labas ng evacuation centers (1,952)
Wala pa mang datos ang NDRRMC pagdating sa pinsalang itinamo nito sa imprastruktura at agrikultura, nakapaglabas na ng P1.23 milyong halagang tulong pinansyal ang provincial government ng Batangas, mga local government units at Deparmtent of Health. Kasama na riyan ang:
- family food packs
- gamot
- surgical masks
- N95 masks
- face shield
- gloves
- cover all
- collapsible drinking water
- atbp.
Wala namang naitalang volcanic earthquakes ang Phivolcs sa nakaraang 24 oras, ngunit merong ilang low level background tremor.
Mula ika-30 ng Marso, nakapaglabas ng 6,405 tonelada sulfur dioxide flux ang bulkan. Maliban pa 'yan sa ibinugang plume na umabot ng 1,500 metrong kataas (moderate emission).
BULKANG TAAL
— PHIVOLCS-DOST (@phivolcs_dost) March 31, 2022
Buod ng 24 oras na pagmamanman
31 Marso 2022 alas-5 ng umaga #TaalVolcano
Filipino: https://t.co/5giLkagMGW
English: https://t.co/szpRDGeF9C pic.twitter.com/akRVuSdzbS
Bawal pa rin sa ngayon ang:
- pagpasok sa Taal Volcano Island (permanent danger zone) at high-risk baranggays ng Agoncillo at Laurel, Batangas sa ngayon
- lahat ng aktibidad sa Taal Lake
- pagpapalipad ng anumang eroplano malapit sa bulkan
Kahapon lang nang ianunsyo sa state media na suspendido muna ang mga klase sa 19 paaralan sa probinsya ng Batangas kaugnay ng nasabing pagputok ng bulkan. — James Relativo
- Latest
