NCR, 38 probinsiya Alert Level 1 na
Simula Marso 1-15
MANILA, Philippines — Simula bukas ay isasailalim na sa Alert level 1 ang National Capital Region (NCR) at 38 pang lalawigan sa bansa.
Sa inilabas na listahan ng Inter-Agency Task Force (IATF), epektibo sa Marso 1 hanggang Marso 15 ilalagay na sa Alert Level 1 ang NCR, Abra, Apayao, Baguio City, Kalinga, Dagupan City, Ilocos Norte, Ilocos Sur, La Union at Pangasinan.
Gayundin ang Batanes, Cagayan, Santiago City, Isabela at Quirino habang sa Region 3 ay Pampanga, Angeles City, Bataan, Aurora, Olongapo City, Tarlac at Bulacan.
Sa Region 4A ang Cavite at Laguna, gayundin sa Marinduque, Puerto Princesa City at Romblon; Naga City at Catanduanes.
Sa Visayas: Aklan, Guimaras, Bacolod City, Capiz, Siquijor, Biliran, Zamboanga City, Cagayan de Oro City, Camiguin at Davao City.
Habang ang mga hindi nabanggit ay nasa Alert Level 2.
Sa kasalukuyan ay wala ng nasa Alert Level 3 sa buong bansa.
Sinabi ni Cabinet Secretary Karlo Nograles na naging matagumpay ang Inter-Agency Task Force (IATF) sa pangangasiwa at pagbalanse ng buhay at kabuhayan ng mga mamamayan kaya’t napababa na ang mga kaso ng COVID-19.
Muli na rin namang nabuksan ang lahat ng sektor simula pa noong nakaraang taon, na nagresulta sa pagsisimula muli ng recovery at pagbangon ng ekonomiya ng bansa.
Plano na umano nitong alisin ang natitira pang restriksiyon sa operating capacity, physically barriers, at wala na ring ipaiiral na age restrictions.
Gayunman, kinakailangan pa rin umano ng mga mamamayan na tumalima sa mga umiiral na health protocols gaya nang pagsusuot ng face masks, mag-obserba ng social distancing at regular na maghugas ng kamay.
Paiigtingin pa rin lalo ng pamahalaan ang kanilang vaccination drive upang matiyak na ang mga mamamayan ay protektado na laban sa COVID.
Habang ang face-to-face classes naman para sa basic education ay subject pa rin sa approval ng Office of the President.
- Latest