Ka Leody kumasa sa rights group: De Lima palalayain kung palarin sa 2022
MANILA, Philippines — Nanindigan ang kandidato sa pagkapangulo na si Ka Leody de Guzman na dapat nang palayain ang isang senadora't human rights advocate na ikinulong sa ilalim ni Pangulong Rodrigo Duterte "bilang bahagi ng oposisyon."
Miyerkules nang manawagan si Brad Adams, Asia director ng Human Rights Watch (HRW), sa mga kumakandidato sa pagkapangulo sa 2022 na bawiin ang mga kaso laban kay De Lima — na limang taon na sa kulungan sa Huwebes.
"Matagal na akong naniniwala na biktima ng malisyosong atake si Senadora Leila De Lima ng rehimeng malupit sa mga dukha, at gayundin sa mga pampulitikang oposisyon," ani De Guzman, isang labor leader, sa inilabas na statement kanina.
"Patuloy din tayong naninindigan at nanawagan na dapat itigil ang harassment sa kanya at agad palayin para makapiling ang kanyang ina at pamilya."
Ika-24 ng Pebrero nang sumama si De Lima sa kanyang arresting police officers sa Lungsod ng Pasay matapos kasuhan ng tatlong drug trafficking charges, na kalaunan ay inamyendahan para maging "conspiracy to commit drug charges."
Isang kilalang kritiko ng human rights record ni Digong, pinararatangan si De Lima na "tumanggap" daw ng pera mula sa kalakalan ng iligal na droga sa loob ng New Bilibid Prison noong siya'y kalihim pa ng Department of Justice.
Hulyo 2021 pa lang nang ianunsyo ni De Lima na tatakbo siya uli sa pagkasenador sa 2022. Kasama siya sa mga ineendorso ngayon nina De Guzman, presidential candidate at Bise Presidente Leni Robredo, Liberal Party at 1Sambayan.
Paniwala ni De Lima, ang tanging kasalanan niya ay ang pagsasalita laban sa extrajudicial kilings sa ilalim ni Digong, habang ang mga "big-time" drug lords daw gaya ni Peter Lim ay hindi maiharap ni Duterte sa korte.
"Senator de Lima’s long-term wrongful detention exemplifies the lawlessness and cruelty of the Duterte administration," ani Adams.
"Candidates for president should commit to free De Lima immediately and to rebuild the Philippines’ tarnished criminal justice system to meet international standards." — James Relativo
- Latest
