Ilang presidentiables ‘di sisipot sa debate ng network ni Quiboloy

MANILA, Philippines — Hindi dadalo sina Senators Panfilo Lacson at Manny Pacquiao sa presidential debates na inorganisa ng  media network na Sonshine Media Media Network International (SMNI) ng kontrobersyal na si Pastor Apollo Quiboloy.

Sa tweet ni Lacson, sinabi niya na nagdesisyon na sila ng kanyang running mate na si Senate President Vicente Sotto III na hindi dadalo sa naturang debate dahil nakapag endorso na si Quiboloy ng kanyang kandidato sa darating na eleksyon.

Naunang inindorso ni Quiboloy ang kandidatura ni dating Senador Ferdinand “Bongbong” Marcos Jr., at Davao City Mayor Sara Duterte para sa May 2022 elections.

Tumanggi naman si Pacquiao na dumalo sa debate dahil sa kinakaharap ni Quiboloy na mga kaso sa Estados Unidos at wanted ng Federal Bureau of Investigation (FBI).

Giit pa ng Senador hindi niya kaya sa kanyang konsensya na maging bahagi ng mga aktibidad na inorganisa ng isang tao na mayroong mga krimen at ginagamit ang pangalan ng Diyos para magamit lang sa scams.

Bukod dito mayroon din nakabinbing pang cyber-libel complaint laban kay Quiboloy kaya mas mabuting hindi siya dumalo sa debate na inorganisa ng istasyon nito.

Ang presidential debate na inorganisa ng SMNI ay nakatakda sana ngayong araw Pebrero 15 habang ang vice-presidetial debate ay sa Pebrero 22.

Maging si Bise Presidente Leni Robredo ay hindi makakadalo sa presidential debate ng SMNI bukas.

Ayon sa tagapagsalita ni Robredo na si Atty. Barry Gutierrez, puno ang schedule ni Robredo sa naturang araw subalit tiniyak na sa darating na debate na inorganisa ng Comelec ay dadalo sila.

Samantala, hindi rin makakadalo si Manila Mayor Isko Moreno dahil nasa Samar ito.