Pinas ‘critical risk’ na sa COVID-19- DOH
Omicron dominanteng variant na
MANILA, Philippines — Inamin ni Health Secretary Francisco Duque III na “critical risk” na ang klasipikasyon ng Pilipinas sa COVID-19 dahil sa biglang pagtaas ng bilang ng mga nahahawa dahil sa Omicron variant.
Sa ulat ni Duque kay Pangulong Rodrigo Duterte, sinabi nito na naitala ang 690% na pagtaas sa pitong araw na average daily reporting cases.
“Ang ating bansa ay kasalukuyang nasa critical risk case classification, na may pagtaas na 690% sa seven-day average of daily reporting cases,” ani Duque.
Sinabi rin ni Duque na nalampasan na ng Omicron ang Delta bilang dominant na variant sa bansa.
“Base sa pinakahuling run of whole genome sequencing, 60% na po ng samples na nasequence ay positive na po for Omicron varaint so siya na po nagdo-dominate na variant whereas before it was the Delta,” ayon kay Duque.
Iniulat din ni Duque na bagaman at tumataas ang mga kaso araw-araw, mas mababa naman ang nasa severe at kritikal na kaso kumpara noong Setyembre kung saan naitala rin ang pagtaas ng impeksiyon.
Nauna rito, iniulat ng health department noong Enero 3 na nasa “high risk” na ang bansa sa COVID-19 matapos ang biglang pagtaas ng kaso.
- Latest
