183 biyahero mula South Africa, hanap ng DOH
MANILA, Philippines — Kasalukuyang tinutukoy ngayon ng Department of Health (DOH) ang 183 sa 254 biyahero mula sa South Africa na dumating sa Pilipinas mula Nobyembre 15 hanggang 19 kasunod ng banta ng Omicron variant.
Sinabi ni Health Undersecretary Maria Rosario Vergeire na 71 na sa 254 biyahero ang kanilang natukoy. Sa 254, nasa 250 sa mga ito ay mga ‘returning overseas Filipinos (ROFs)’ habang apat ay mga dayuhan.
Sa 71 natukoy, apat na ang sumailalim sa COVID-19 re-testing at tatlo ang nagnegatibo. Nasa 67 biyahero pa ang naka-iskedyul na sumailalim sa re-testing.
Inatasan na ang mga lokal na pamahalaan, Bureau of Quarantine at Department of the Interior and Local Government (DILG) na hanapin ang mga dumating na biyahero na nagmula sa mga bansa na nasa ‘red list’ mula Nobyembre 19-26.
Kabilang sa mga bansang inilagay sa ‘red list’ ang Botswana, Eswatini, Lesotho, Mozambique, Namibia, South Africa, Zimbabwe, Belgium, Italy, Austria, Czech Republic, Hungary, The Netherlands, at Switzerland mula Nob. 28 hanggang Disyembre 15.
Samantala, naisailalim na sa COVID-19 re-testing ang tatlong South African nationals na dumating sa Negros Occidental noong Nobyembre 25 at 26 at hinihintay pa ang resulta nito. Bakunado naman umano sila at sumasailalim na sa ‘home quarantine’ sa isang paupahang bahay.
- Latest