Sotto kay Duterte: SALN boluntaryong isapubliko
MANILA, Philippines — Nais ni Senate President Vicente Sotto III na isapubliko ni Pangulong Rodrigo Duterte ang kanyang statement of assets, liabilities and net worth (SALN).
Ayon kay Sotto, dapat voluntary ang pagsasapubliko ng SALN ng mga kandidato.
Paliwanag pa niya, inaasahan ng tao na magkaroon ng transparency sa mga leader ng bansa at kabilang dito si Duterte dahil siya ang pangulo ng bansa.
Magugunita na huling isinapubliko ni Duterte ang kanyang SALN noong 2017 pa kung saan nagdeklara siya ng net worth na P28.5 million at sa kabila ng kahilingan na ibunyag ang dokumento nito ay hindi isinapubliko ng Pangulo ang kanyang SALN noong 2018 at 2019.
Ito ang reaksyon ni Sotto sa mungkahi ni Sorsogon Gov. Francis “Chiz” Escudero, kandidato sa pagka-senador, na dapat ibunyag ng mga kandidato sa national at local election ang kanilang SALN.
Subalit giit ni Sotto, maaring ideklara itong unconstitutional ng Supreme Court kung gagawin requirement sa mga kandidato ang pagdeklara ng kanilang SALN.
Matutulad lamang umano ito sa ginawang pagbasura ng SC sa mandatory drug testing para sa mga kandidato.
Nauna nang sinabi ng Malacañang na pinapaubaya na ni Duterte sa Office of the Ombudsman ang pag-release ng kanyang SALN.
- Latest