MANILA, Philippines — Muling nanguna si Pangulong Rodrigo Duterte sa trust rating survey matapos makakuha ng 52.93 porsyentong high trust rating at 23.6 porsyentong low trust rating sa October 2021 third quarter survey ng Publicus Asia Inc.
Sumunod sa kanya si Vice President Leni Robredo na may 22 porsyentong high trust rating at 46 porsyentong low trust rating.
Si Senate President Tito Sotto ay nakakuha ng 19.8% high trust at 35.2% low trust rating samantalang si Supreme Court Chief Justice Alexander Gesmundo ay nakapagtala ng 14.6% high trust rating at 29.6% low trust rating.
Nasa hulihan si House Speaker Lord Allan Velasco na nakakuha lang ng 12.067 porsyentong high trust rating at 35.8 porsyentong low trust rating.
Ang nakuha ni Velasco sa survey noong Oktubre 11 hanggang 18 ay mas mababa pa sa kanyang mga nakuha sa mga naunang survey ng Publicus.
Sa second quarter survey, si Velasco ay nakakuha ng 13.93% high trust at 36.27% low trust.
Sa first quarter survey ay 14.53% high trust at 35.33% low trust at sa huling survey ng Publicus noong 2020, nakakuha si Velasco ng 18.13% high trust rating at 30.20% low trust rating.
Walang nagkomisyon sa Publicus upang gawin ang survey. Mayroon itong 1,500 respondents.