Isko: ‘Lumaki akong busabos, pero ‘di bastos’
MANILA, Philippines — “Opo, lumaki akong busabos, ngunit hindi ako naging bastos.”
Ito ang tinuran ni Manila City Mayor Isko Moreno makaraang pormal na magdeklara kahapon ng kanilang kandidatura ni health vlogger Doc Willie Ong para sa darating na Presidential at Vice-Presidential elections sa 2022 sa Baseco, Tondo, Maynila.
Ibinahagi ni Moreno na hanggang ngayon ay nakakaranas pa rin siya ng pangmamata dahil sa kaniyang pinagmulan sa Tondo. Ngunit iginiit niya na ang natutunan niya sa ‘public administration’ ay hindi niya natutunan sa paaralan ngunit sa mga ‘squatter’s area’ ng Tondo.
“Buong kababaang-loob na inihahayag ko sa inyo mga kababayan ko: Sa darating na Mayo, tanggapin n’yo po ang aking aplikasyon bilang Pangu-lo ng Pilipinas,” bahagi ng talumpati ni Moreno.
Iginiit ni Moreno na hindi ang matayog na ambisyon ang nagtulak sa kaniya sa desisyon ngunit ang kalunus-lunos umanong kundisyon ng bansa. Habang ginagawa umano ng ibang bansa ang ‘best practices’ sa paglaban sa COVID-19, ginagamit naman umano sa Pilipinas ang taumbayan bilang mga ‘guinea pigs’ sa pinakamahaba at pinaka-istriktong “unli quarantines”.
“557 days na po tayong nasa quarantine. But instead of flattening the curve, we have flattened our eco-nomy,” ayon pa sa alkalde.
Sa mga susunod na araw ilalabas ni Moreno ang kaniyang plataporma ngunit marami sa mga ito ay ginagawa na umano niya sa lungsod ng Maynila.
Kabilang dito ang iba’t ibang ‘housing projects’ para sa mga mahihirap, pampublikong ospital, pagprayoridad sa edukasyon at internet connectivity, pagnenegosyo, at kalinisan.
Idinagdag pa niya ang pagkakaroon ng ‘inclusive government’ na kasama ang lahat tulad ng ginagawa niya sa Maynila na nakapag-aaral sa kanilang mga pinatatakbong unibersidad at nagkapagpapagamot sa kanilang mga ospital maging mga hindi residente ng Maynila.
Related video:
- Latest