PDP-Laban meeting ng Pacquiao camp sa Sept. ‘ilegal’
MANILA, Philippines — Ilegal umano ang gagawing national council meeting sa Setyembre ng kampo ng pinatalsik na PDP-Laban president Sen. Manny Pacquiao.
“Ilegal po ‘yun, ‘yun po ang ilegal sapagkat malinaw po sa aming konstitusyon na ang maaari lamang magpatawag ng national council meeting ay ang chairman ng partido, who is President Duterte, in coordination with the party president,” ayon kay Atty. Melvin Matibag, Secretary General ng kampo ni PDP-Laban president Alfonso Cusi.
Subalit sagot ni Sen. Koko Pimentel, bakit ngayon ay kailangan na nilang makipag-coordinate sa chairman ng presidente na si Cusi subalit noong panahon ni Pacquiao ay hindi umano ito ginawa ng kampo nila Matibag.
Inihalal ng PDP-Laban si Cusi bilang kapalit ni Pacquiao sa ginanap na national assembly noong Sabado.
“So ngayon po, kung magkakaroon kami ng national council meeting, ang magpapatawag po ay si Pangulong [Rodrigo] Duterte at makikipag-coordinate po kay Secretary Alfonso Cusi,” sabi ni Matibag.
Sa kabila, nito nilinaw ni Matibag na miyembro pa rin ng partido sina Pacquiao at Pimentel.
- Latest
