US binantaan uli ang Tsina: Pilipinas dedepensahan namin oras na atakihin niyo
MANILA, Philippines — Nasa likod lang ng Pilipinas ang Estados Unidos oras na magkaroon ng armadong kumprontasyon laban sa Tsina, muling pagdidiin ng Estados Unidos sa ika-limang taon ng arbitral ruling noong 2016.
Ngayong araw nang i-reaffirm ng Amerika ang kanilang July 13, 2020 policy sa South China Sea kasabay ng anibersaryo ng pagkapanalo ng Pilipinas sa sovereign right sa West Philippine Sea, bagay na kanilang exclusive economic zone (EEZ) sa international law.
"We also reaffirm that an armed attack on Philippine armed forces, public vessels, or aircraft in the South China Sea would invoke U.S. mutual defense commitments under Article IV of the 1951 U.S.-Philippines Mutual Defense Treaty," ani US Secretary of State Anthony Blinken, Lunes (Linggo sa Amerika).
"We call on the [People's Republic of China] to abide by its obligations under international law, cease its provocative behavior, and take steps to reassure the international community that it is committed to the rules-based maritime order that respects the rights of all countries, big and small."
Hindi pa rin kinikilala ng Beijing ang 2016 arbitral ruling hanggang sa ngayon, dahilan para imintena pa rin nila ang mga Chinese military bases sa mga itinayong artificial islands doon, maliban pa sa daan-daang Tsinong militia na nagpapaikot-ikot sa naturang katubigan.
Hunyo lang nang ma-detect ng US-based geospatial imagery and data analysis company na Simularity ang 238 ships na pumasok sa nasabing EEZ ng Pilipinas, bagay na posibleng galing daw sa Tsina. Kilala ring nagpapaalis ng mga Pilipinong mangingisda ang mga Tsino sa pinag-aagawang teritoryo.
Ang West Philippine Sea, na sakop ng 200-nautical mile EEZ ng Maynila, ay nasa loob din ng South China Sea. Sa kabila niyan, Mayo nang matatandaang nagpatupad ng fishing moratorium ang Beijing sa West Philippine Sea kahit hindi nila ito jurisdiction.
Ipinatutupad din hanggang sa ngayon ng Tsina ang kanilang China coast guard law sa lugar, na siyang nagbibigay ng kapangyarihan sa Beijing na paputukan ang mga foreign vessels sa South China Sea.
"Nowhere is the rules-based maritime order under greater threat than in the South China Sea. The People’s Republic of China (PRC) continues to coerce and intimidate Southeast Asian coastal states, threatening freedom of navigation in this critical global throughway," patuloy ng Amerika.
Dagdag pa ni Blinken, interes ng lahat ng bansa ang "freedom of the seas," na siyang mahalaga para sa kapayapaan at kasaganahan.
Pebrero 2021 lang nang bantaan ng Tsina ang Estados Unidos matapos maglayag ang warship nilang USS John S. McCain malapit sa contested waters ng South China Sea, na siyang unang engkwentrong naisapubliko sa pagitan ng US at Tsina sa ilalim ni US President Joe Biden. — James Relativo
- Latest
