3 scenario sa SONA pinag-aaralan na
MANILA, Philippines — Pinag-aaralan na ang tatlong scenario para sa State of the Nation Address (SONA) ni Pangulong Rodrigo Duterte sa Hulyo, ayon kay Senate President Vicente “Tito” Sotto III.
Sabi ni Sotto, sa ngayon ay hinihintay pa ng Senado ang magiging abiso sa kanila ng Presidential Security Group (PSG) kung alin sa tatlong pinagpipilian options ang susundin.
Ang unang option aniya ay sundin kung ano ang ginawa noong nakaraang taon pero ang mga papupuntahin ay ’yung mga nabakunahan na laban sa COVID-19.
“Yung isang option ay ’yung katulad nung last year, number of Congressmen, malamang puro vaccinated lang. Tapos a number of senators, kasama ’yung secretariat at… siguro maximum sa Senate would be 30. Sa house baka 70. And then, speaker and myself. So ’yun ’yung scenario number 1. Pareho last year, nadagdagan lang ng number ng konti,” ani Sotto.
Ang ikalawa ay mananatili si Duterte sa Malacañang samantalang ang mga mambabatas ay nasa Batasan at virtual ang magiging SONA.
Ang ikatlong scenario ay virtual SONA rin kung saan nasa Malacañang si Duterte kasama sina Sotto at Speaker Lord Allan Velasco samantalang ang mga mambabatas ay nasa Batasan sa Quezon City.
- Latest