Swab test sa fully-vaccinated Pinoy na papasok ng bansa, pinatatanggal
MANILA, Philippines — Inirekomenda na ng Department of Health (DOH) na tanggalin na ang polisiya na isailalim sa COVID-19 swab test ang mga Filipino na papasok ng bansa kung nakakumpleto na sila ng bakuna sa abroad.
Ngunit nilinaw ni Health Undersecretary at spokesperson Maria Rosario Vergeire na hindi pa ito maipatutupad dahil pag-aaralan pa naman ito ng mga opisyal ng Inter-Agency Task Force (IATF) lalo na kung paano mabeberepika kung totoong kumpleto na ang isang biyahero ng kaniyang bakuna.
Sa unang binagong panuntunan para sa mga biyahero na nakakumpleto ng bakuna dito sa Pilipinas, kailangan na lamang sumailalim sa pitong araw na quarantine ang mga papasok muli sa bansa at hindi na kailangang sumailalim sa COVID-19 tests.
“Ganyan din po ang ating nirerekomenda for those vaccinated abroad na mga Pilipino na babalik dito pero hindi pa po natin ‘yan na naipa-finalize,” saad ni Vergeire.
Sinabi pa ng opisyal na base umano sa mga eksperto, kahit hindi isailalim sa tests ang isang biyahero basta naisailalim siya sa isolation ng sapat na araw ay magiging ligtas na ito.
Sa kabila ng mga bagong pagluluwag, tiniyak ng DOH na patuloy silang nagiging maingat sa pagtatanggal ng mga restriksyon sa mga fully vaccinated na indibidwal.
Sa kasalukuyan, nasa 1.8 milyong Pilipino pa lamang ang nakakakumpleto ng dalawang doses ng bakuna nitong Hunyo 14 na halos dalawang porsyento pa lamang ng populasyon ng bansa.
- Latest
