Call center workers kasama sa A4 priority list

MANILA, Philippines — Kasama na ang mga call center agents at iba pang nagtatrabaho sa ‘business process outsourcing (BPO) sector’ sa A4 priority group sa ‘vaccination program’ ng pamahalaan.

Ito ay makaraang aprubahan ng Inter-Agency Task Force on Emerging Infectious Diseases (IATF-EID) ang pag-endorso ng Department of Trade and Industry (DTI) para maging ligtas ang mga manggagawa sa BPO industry laban sa COVID-19.

Kasama sa A4 priority groups ang mga ‘government at economic frontliners’. Sinabi ni DTI Secretary Ramon Lopez na krusyal ang BPO industry sa ekonomiya ng bansa dahil sa kontribusyon nitong US$30 bilyon kada taon. 

Mas higit pa ito sa ‘remittances’ ng mga OFWs.

Ito rin umano ang sektor na patuloy na bumuhay sa bansa dahil sa hindi nag-layoff ng mga empleyado at nagpatuloy sa pagtanggap ng mga bagong empleyado.

Tinatayang may 1.3 milyong direct employment sa BPO industry ang makikinabang sa maagang pagpapabakuna sa kanila.