UN giit makialam vs China ‘aggression’ sa WPS
MANILA, Philippines — Nanawagan ang isang grupo ng mga mangingisda sa United Nations (UN) na kumilos sa panghihimasok ng China sa West Philippine Sea (WPS).
Sa inihaing petition ng Pambansang Lakas ng Kilusang Mamalakaya ng Pilipinas (Pamalakaya), hiniling nila na ideklara ng UN ang batas ng China Coast Guard na null and void.
Gayundin ang demilitarization sa South China Sea at imbestigahan ang panghihimasok sa kabuhayan ng mga Filipino.
Iginiit ni Fernando Hicap, national chairperson ng Pamalakaya, na ang petition ay tumutugon lang sa arbitral ruling laban sa China, kabilang dito ang kaagad na pag-aalis ng Chinese personnel sa karagatang sakop ng Pilipinas, respetuhin ang karapatan ng mga mangingisdang Pinoy at i-demilitarize ang lugar ng kanilang pangisdaan.
Samantala, hinikayat din ng grupong Oceana Philippines ang gobyerno na protektahan ang mga mangingisdang Filipino sa pamamagitan ng paglalagay ng mekanismo tulad ng trackers sa kanilang mga bangka.
Sinabi ng grupo na malinaw ang nakasaad sa fisheries law na kailangang mayroong tracking device para sa mga commercial fishing vessels, subalit kung patuloy umanong babalewalain ang kahalagahan nito ay hindi mapipigilan ang iligal na pangingisda at harassment ng mga Tsino.
- Latest