Pinas naghain ng 2 panibagong diplomatic protest vs China

MANILA, Philippines — Dalawang panibagong diplomatic protest pa ang inihain ng Pilipinas laban sa China dahil sa namataang 160 Chinese vessels sa karagatang sakop ng Pilipinas.

Sa ipinadalang diplomatic note ng Department of Foreign Affairs (DFA) na may petsang Abril 21, sinabi nila na direktang lumalabag sa soberenya at hurisdiksyon ang pananatili ng mga barko ng China.

Ang nasabing mga barko ay namataan sa Kalayaan Group of Island na nasa Exclusive Economic Zone (EEZ) ng Pilipinas at sa karagatang sakop ng Bajo de Masinloc.

Bukod dito, nakita rin sa ilang karagatang sakop ng Pilipinas ang limang barko ng Chinese Coast Guard na may bow numbers na 3103, 3301, 3305, 5101, at 5203 na namataan sa palibot ng Pag-asa Island, Bajo de Masinloc at Ayungin Shoal.

Pinaalala rin ng DFA sa kanilang protesta sa China na ang mga nasabing isla ng Bajo de Masinloc, Pag-asa Islands, Panata, Parola, Kota Islands, Chigua at Burgos Reefs ay bahagi ng Pilipinas.

Ang panibagong diplomatic protests ay karagdagan lamang sa araw-araw na protestang inihahain ng DFA laban sa patuloy na presensya ng mga Chinese vessels sa Julian Felipe Reef.