Back to square one sa ika-1 taon ng lockdown - Binay
MANILA, Philippines — Pinuna kahapon ni Sen. Nancy Binay na kahit isang taon na simula noong magkaroon ng lockdown, “back to square” one o halos walang nangyaring pagsulong sa ginagawang pagsugpo sa COVID-19.
Ayon kay Binay, iba-iba ang ipinararating na mensahe sa mga mamamayan at walang malinaw na exit plan laban sa ningas-cogon approach kaya biglang tumaas na naman ang bilang ng may impeksiyon.
Tinatayang aabot sa 8,000 araw-araw ang magiging kaso ng mga virus hanggang sa katapusan ng Marso sa Metro Manila pa lamang.
Nababahala si Binay na hindi dire-diretsong naipatutupad ang minimum health protocols sa mga public places at maging ng ilang opisyal ng gobyerno.
Pinuna ni Binay na mayroon ding mga national leaders na nagpapakita ng “ningas-cogon” na pag-uugali at nakakalimot na mayroon pang banta ang nakamamatay na virus.
“What’s ironic is that after a year since the lockdown, naririto pa rin tayo... hindi umuusad. Parang walang nagbago—same problems, same issues, same recommendations,” ani Binay.
Naniniwala rin si Binay na ang mga rekomendasyon ng Inter-Agency Task Force (IATF) na pagbubukas ng turismo, mga resorts, sinehan at iba pa ay nagbibigay ng impresyon sa mga mamamayan na balik na ulit sa normal ang lahat at nababalewala ang mensahe na maging maingat dahil lumalakas ang COVID-19.
Tinira rin ni Binay ang mga opisyal ng gobyerno na hindi sumusunod sa mga minimum health protocols.
- Latest