State of emergency sa ASF inindorso ng Senado

MANILA, Philippines — Inindorso na ng Senado sa Malakanyang na magdeklara ng state of national emergency dahil sa pagkalat ng African Swine Fever (ASF) na pumipeste sa mga baboy.

Ayon kay Sen. Cynthia Villar, chairman ng Senate committee on agriculture, kapag may state of national emergency ay maglalaan ang gobyerno ng pondo na pang ayuda sa mga magbababoy na mapipilitan na ipapatay ang kanilang mga alaga at hindi na ibenta dahil may ASF.

Nauna namang sinabi ng Department of Agriculture (DA) na maglalabas sila ng P28 bilyon na pang tulong sa magbababoy dahil sa ASF subalit luma­labas na ang P27 bilyon nito ay ipapautang nito at ang P500 milyon lamang ang ibibigay bilang ayuda.

Mapagkukunan naman umano ng pangtulong sa mga hog raisers ang nakukuhang taripa o buwis sa importasyon sa mga baboy.

Sinabi naman ni Agriculture undersecretary Ariel Cayanan na nagbibigay na sila ng ayuda para sa bawat baboy na nagkakasakit.

Iginiit ni Villar na hindi ito sapat dahil mabagal ang pamimigay.